San Remegio, Cebu
Sus, bag-ong tuig na da, kadali rang moligid ang panahon..., panahon na ni nga magbag-o ko sa akong kinabuhi, ayohon na gyud nako pag-amuma ang akong mga anak isip dan-ag ug suga sa among panimalay, nakapangyamyam ning mga pulonga si Takya samtang naglakaw siya padulong sa ilang balay gikan nga nag tong-its sa iyang mga kabarkadang mga silingan.
Kini man gud si Takya naungo na sa sugal sa tong-its ug manglibak pa gyud sa mga tawong mangagi kun molabay sa ilang tungod samtang magsugal sila diha daplin sa dalan. Mao ning mga bisyoha nga sentro sa ilang away ug lalis sa iyang bana nga si Badong nga usa ka tapasero sa katubhan ni Mr. Chiong sa ilang dapit.
“Unsa may kan-on nato sa paniudto Takya nga wala man ka magluto ug maghikay! Ipareha man ko nimo nga wala’y kaun-kaon basta makasugal ka lang, unsa man Takya baraha nalay kan-on nato ani?†Isog kaayo si Badong nga namulong ning mga pulonga.
“Maypag ilabay ko ning kaldero klaaaang!!!!,†gitinuod gyud og salibay ni Badong ang kaldero gawas sa ilang kusina.
“Hu, hu, hu, agay kasakit sa akong tiyan, gutom na kaayo,†ngaab sa kagutom sa anak nilang si Bulanso.
Nahanduraw ni Takya kining mga hitaboa samtang mao pa gyu’y pagsulod niya sa ilang balay.
“Oy, Takya dia ka na man diay...dali magdungan na lang tag-kaon kay naka-bring house ko’g lechon manok ug isdang iskabitsi gikan sa party namo sa ilang Mr. Chiong ug gihatagan pa gyud mi niya og gamay’ng bonus isip pahalipay,†agda ni Badong nga nagkaon na sa paa sa manok uban sa ilang anak nga si Bulanso.
“Aw, o Badong magdungan na lang ta og kaon,†tubag ni Takya. Ug diha sa ilang pagpangaon, mipulong si Takya nga seryoso kaayo.
“Badong, Bulanso anak, isaad ko kaninyo nga karong bag-ong tuig undangon na nako ang pagkaungo sa sugal sa tong-its ug likayan na sab nako ang pagpanglibak sa atong isigkaingon,†temang pa ni Takya. (Kataposan)