Gula 48
Kun magsubo si Albert, maapektohan gyud og maayo si Nang Gloria. Busa karon nga mikuyog ang iyang anak sa paglingawlingaw uban sa mga dalaga, ingon sa nakaginhawa siya’g diyotay nga kahayahay.
Pila na ka semana ang milabay sukad sa paglarga ni Josheba, gisuwayan ni Albert ang pag-abli ang iyang computer kay gusto niya mo-open sa iyang email ug facebook. Tataw lamang nga naka-adjust na si Albert sa iyang kahimtang ug mibalik na ang normal niyang kinabuhi.
Sa iyang pag-abli sa iyang email account mao dayo’y misugat kaniya ang email sa iyang hinigugma. Nalipay ang ulitawo samtang nagbasa sa mensahe. Nasayran ni Albert nga kadali rang naka-adjust si Josheba sa iyang kaugalingon sa bag-o niining environment didto sa Canada. Gipadayag sa dalaga ang kadako sa iyang tinguha nga makatigom og dakudako nga kantidad alang sa ilang kasal ni Albert. Tungod niini, hilabihan ang pag-amping sa iyang hinigugma nga dili makalapas sa mga sumbahan nga gipatuman sa ospital nga gialagaran.
Nahimong sayon kang Josheba ang pagkat-on sa inadlaw nga mga bulohaton didto tungod ra usab sa pipila ka mga Pinay nga kauban niya sa work.
Gilakip usab ni Josheba paghisgot ang tumang kamingaw niya kang Albert. Mi-advice kini kang Albert nga iyang ampingan ang kahimsog sa lawas. Gihangyo si Albert ni Josheba nga dili siya maghunahuna og bisan unsa bahin kaniya nga wala’y angay kabalak-an si Albert. -- Sumpayan pa