“Ah, mao ba,” matud ni Nang Gloria. “Nganong dili mo man sulayan ang pagpakig-ilaila sa uban diha aron malingaw ka?” misugyot si Nang Gloria. “Mas maayo sa tawo kun daghan siya’g kaila. Ug dili maayo nga nia ka lang sa atong balay magsige’g yampungad ug hinuktok kun wala ka nay trabaho.”
Usa niana ka adlaw ni online si Albert sa internet ug nagka-chat sila si Eking nagkumostahay silang duha ug naghatagay usab og number sa cellphone. Kay may cellphone na man si Eking.
Gibalitaan siya niini sa iyang panghitabo didto sa Iloilo nga nahilambigit ang iyang higala. Madugay pa kuno kini didto sa Iloilo. Duna pa kini daghang giatiman ug atimanunon didto. Tungod kay nakasud man kini og trabaho didto ra usab sa gialagaran sa iyang igsuon bisan pa man kun contractual lang.
Tungod kay madugay pa man ang iyang higala, nakahunahuna si Albert nga suwayan ang gisugyot sa iyang inahan nga makig-ilaila sa laing mga tawo.
Usa ka adlaw niana, si Albert gihapit sa iyang mga silingan nga pulos mga dalaga. Moadto sila sa kasal sa ilang classmate sa una dihang nagtungha pa sila sa high school. Naatol usab nga day-off ni Albert busa puyde ra kini nga magabhian pagpauli.
“Nang Gloria,” miingon si Amariah sa inahan ni Albert, “guwapo man diay kaayo ang imong anak nga nars. Kun wala pa nako ilisi ang akong antiyohos, di tingali nako maklaro ang iyang kaguwapo. -- Sumpayan pa