Unsa may imong ikasulti ini attorney, nga gihangyo man ko ni Noy Loloy nga di na lang nako apelahan ang desisyon sa huwes? Nagsabot na man unta ta nga atong ipa-review sa Court of Appeals ang desisyon ni Judge Owen Ubod sa RTC Br. 98 ni Miss Annie Palwa nga bisita sa abogado ning sayong kahaponon. “Isip abogado nimo, ako maoy magdala sa imong tingog. Ikaw maoy magbuot kun unsay imong hukom. Agad lang ko nimo. Apan sa gikaingon ko na nga lisod mausab sa labaw’ng hukmanan ang desisyon sa huwes kun modaug ang akusado sa kasong criminal. Tingale, naglantaw si Judge Ubod nga wala kaayo’y kadaut nga nahiagoman nimo kay nabawi man nimo ang baka nga gikawat sa amaha’g anak. Unya, si Butsoy nga anak ni Noy Loloy maoy niangkon sa salaod ug kasamtangang nagserbisyo na sa iyang sentensiya” ni Atty. Nilo Tukog. Nibira sa hunos aron pagkuha sa folder sa kaso ni Miss Palwa.
“Di ba niingon ka man attorney nga kompleto atong ebidensiya nga dunay conspiracy sa amahan ug anak?’ ni Miss Palwa. Daw gigil-asan sa iyang gilingkuran. “Tinood na. Testigo nato ang polis nga maoy nag-recover sa baka nga gihigot sa nataran sa balay ni Noy Loloy. Diha si Butsoy nga nagpakaon og Napier sa baka. Giangkon ni Noy Loloy nga iya ang baka. Unya pagpangita og papeles kon certificate of registration of large cattle, walay ikapakita. Unya nagtulod-tulod na ang amaha’g anak kun kinsa gyud ang nagkawat sa baka. Testigo nato ang drayber sa multicab nga gikargahan sa baka gikan sa gitugwayan duol sa balay ni Tibong nga imong gipiyalan nga nagbaton sa baka. Nisulti gyud ang drayber nga ang amahan ug anak gyud ang nagkarga sa baka ngadto sa multicab” ni Atty. Tukog. “Sa imong tan-aw attorney, makonbikto kaha si Noy Loloy kun ato gyung ipadayon ang kaso?” ni Miss Palwa. “Dili gyud ko kapaniguro nga siyento porsento modaug ta. Kay unethical man sa abogado nga manigurong modaug. Kay di man gyud maseguro kun ang huwes mosakay sa hunahuna sa abogado. Moingon lang ko nga dako tag purohan modaug. Galing lang, ang demurrer to evidence nga gipasaka ni Atty. Hakhak, abogado ni Noy Loloy, gi-grant man sa huwes. Ang demurrer to evidence sa inato nga pagkasulti, motion to dismiss na on grounds of insufficient evidence. Nakonbinser man si Judge Ubod nga huyang atong ebidensiya. Maong nidaug si Noy Loloy. Na-dismissed ang kaso imong gipasaka batok niya” sa abogado.
“Di ba ang conspiracy, act of one, act of all? Kay niangkon sa sala ang anak, sad-an sab ang amahan?’ sa kliyente. “Mao gyud unta” nakapahiyom ang abogado. “Apan ang huwes god, puwede man motan-aw sa hustisya. Dili sa tanang higayon basihan ang balaod o ebidensiya. Kay nauli man nimo ang kinawat, unya may napriso na man, iya na lang tingaleng nahukman nga ang tiguwang buhian na lang. Kay basi’g adto mamatay sa prisohan” sa abogado. “Bitaw attorney. Mora ra ba’g nagluya na ang tiguwang. Unya gihangyo ko niya nga kay Pasko man gyud ron, bisa’g pinaskohan na lang niya ang pagpasaylo” sa kliyente.
Niginhawa’g lawom ang abogado. Natandog sa iyang nadungog. Gibati’g kalooy sa tiguwang. “Sa ako nang gikaingon, naa ra nimo kun imo ba siyang pasayloon. Pero, nakita nato nga sa pulong sa huwes way sala si Noy Loloy. Ang iya rang anak kay mao ra may niangkon sa salaod” sa abogado. Nipakli sa folder ibabaw sa lamesa, sa kaso nga People of the Philippines versus Cornelio Sugong and Primitivo Sugong, for theft of large cattle. “Sigi, attorney. Ako na lang pasaligan si Noy Loloy nga dili na lang ta moapelar. Ayaw na la’g ipadayon to ang apelasyon,” ni Miss Palwa. “Unya nakahatag na ra ba ka’g acceptance fee. Iuli na lang nako?” sa abogado. “Ay na lang. Pinaskohan ko lang na nimo” sa kliyente. “Salamat kun mao kana. Ug Merry Christmas sab kanimo. I wish you are in the best of health, wealth and everything this Christmas and every day of the coming new year” sa abogado. “Same to you, attorney” ni Miss Palwa. Nitindog. Nitindog sab ang abogado. Naglamano sila. Ug nanamilit ang dalaga. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag)