Walay bisan gamay nga ideya nga misantop sa hunahuna ni Albert mahitungod sa gipanulti sa iyang higala nga si Eking.
Wala motubag si Eking sa iyang pangutana. Mitungab kini sa baso nga may sulod nga beer.
Unya, takulahaw lang dihay nahinumdoman si Albert. Ang baso nga gisudlan sa beer wala niya madayon pagtungab. Miungot kini diha sa iyang mga kamot nga naghakgom.
Misantop karon sa iyang kaisipan nga wala pa diay niya kasuginli si Eking sa nahitabo nila ni Josheba sa wala pa kini molarga ngadto sa Canada. Nakahukom siya nga tug-anan niya ang iyang higala.
Apan si Eking ang unang namulong.
“Kinahanglang ipahungaw ko kini karon, Brod,” ni Eking pa, “aron mogaan ang akong gibati. “Mitungab na usab si Eking sa beer nga diha sa iyang baso. Pag-angkon ko kini sa dakong sayop nga akong nahimo ninyong duha ni Josheba.”
Midiyong ang mga mata ni Albert nga mitan-aw sa higala. Nagpanikad ang iyang kahiladman kay wala gayod siya makatugkad sa gipamulong ni Eking.
“Isulti na ang buot mong isulti, Brod Eking,” ni Albert pa. “Ayaw ako ibutang sa suspense.” -- Sumpayan pa