Diriyot gayud nga na-late sa iyang trabaho sa ospital si Stephanie tungod sa grabeng traffic sa Natalio Bacalso Avenue gikan sa iyang gipuy-an sa Barangay Basak-San Nicolas.
Halos na lang siya nga modagan human siya makakanaug gikan sa iyang gisakyan nga PUJ. Kaduha man gud siya mosakay aron mahiabut sa ospital nga iyang gialagaran sa uptown ning dakbayan.
Igo gayud nga mihagtok ang ika-alas utso ang takna sa buntag dihang miabut si Stephanie sa ospital nga iyang gialagaran. Daghan na nga mga pasyente ang nagpaabot sa ilang turno nga mo-undergo og 2D Echo ug ECG.
Usa si Stephanie sa mga nurse nga nadistino sa pagpahigayon sa 2D Echo, usa ka binag-o nga pamaagi sa pagsusi sa kahimtang sa kasing-kasing sa usa ka pasyente.
“Good morning miss,” matud sa lalaki nga misulod sa kinortinahan nga cubicle diin adto ipahigayon ang 2D Echo. “Good morning sir. What is your name sir and your birth date,” ni Stephanie pa. Gisuta lang ni Stephanie aron dili sila masayop.
Gipatangtang ni Stephanie ang tulo ka botones sa polo shirt sa lalaki aron masayon ra kaniya ang paglihok-lihok sa mora’g mouse sa computer didto sa dughan tungod gayud sa kasing-kasing.
Sanglit may pagka “cute” si Stephanie, naglisud siya’g abot sa wala nga dughan sa lalaki nga naghigda patakilid. Diha sa luyo nga bahin sa lalaki nagbarug si Stephanie ug wala tuyoa nga nabag-id ang iyang dughan sa buko-buko sa pasyente.
“Gilok-gilok man miss,” matud sa lalaki nga miagulo sa paghinay. “Tinuod, gilok g’yud pamation sir samtang ang mouse magdagan-dagan sa imong dughan. Mao nay mobasa kun duna ka bay heart enlargement sir,” pasabot ni Stephanie.
“Nindot ‘sab hinoon kaayo pamation ang akong buko-buko nga nabag-id sa imong dughan miss. Palihug padayona lang,” matud sa lalaki. Naanad na man lang gud si Stephanie kay wala may malisya kun nabag-id ra ang iyang dughan sa buko-buko’s lalaki.
Mipahiyom si Stephanie “Ikaw sir ha malisyoso ka.” Anam-anam nga misibog si Stephanie ug wala na g’yud hinoon modapat ang dughan niini sa buko-buko sa lalaki.
“Sigurado nga wala’y kakulian ang akong kasing-kasing miss basta ikaw ang mopahigayon sa 2D Echo kanako,” giingnan sa lalaki ang nurse samtang nagpahiyom,” ako diay si Japhet miss.
Nagkaila-ila sila si Stephanie ug gitunolan ni Japhet og calling card ang nurse. “Mangayo ko sa imong contact numbers kun pwede,” matud ni Japhet nga mitunol dayon sa iyang selpon.
Mapahiyumon kaayo si Japhet nga mibiya sa ospital. (Sumpayan)