Gula 32
Napiyong sa dalaga ang iyang mga mata sa dihang iyang nahinumduman ang mga higayon nga magkalalis sila si Albert. Siya ang yawitan kaayo. Si Albert magpakahilom lang kun masuko siya. Nakasabot siya nga maglikay ang ulitawo sa pagsilaob sa kalayo.
Unya nakapahiyom si Josheba sa dihang mao na usay iyang nahinumdoman ang walay puas nga kalipay nilang Albert niadtong ulahing mga adlaw sa ilang panag-uban. Ingon diay niini ang gugma, hunghong niya sa kaugalingon. Usahay adunay katam-is, usahay adunay kapait.
Unya wala lang tuyoa nga milakdap sa iyang hunahuna ang nahitabo nilang duha didto sa cottage sa Ocean Pearl beach resort. Hangtod niining higayona gibati pa niya ang kangutngot sa iyang pagka-babaye. Nalipay siya sa ilang gibuhat. Gitugyan niya sa hingpit ang iyang pagka-babaye ngadto kang Albert tungod kay gihigugma niya kini ug mao na ang lalaki nga iyang pakaslan.
Nahimuot si Josheba nga nag-imagine sa performance ni Albert labot sa paglipay sa usa ka babaye. Nasuta niya nga ang iyang hinigugma may kasinatian na sa pagpakigdula og babaye sa ibabaw sa kama. -- Sumpayan pa