Buot kong ipaambit sa tanang bumabasa niining sugilanon ang talagsaong kasinatian sa kinabuhi ning usa ka batan-ong gangster.
Tinun-an sa high school ug anaa sa pang-gabii ang klase si Rodel. Sa iyang kalinghod nahimo siyang sakop sa usa ka gang diin wala’y laing katuyoan kun dili ang pagbugoy-bugoy ug pasikat ngadto sa uban.
Kanunay usab siyang malambigit sa nahitabong karambola batok sa laing mga grupo sulod ug gawas sa tunghaan.
Apan usa ka higayon niana taliwala sa kagubot ug kaguliyang dihay usa ka kaaway nga kalit lang mibunot og kalibre trayenta e-otso nga armas. Sa pagkakita ni Rodel ug kaubanan nga gitutok kini ngadto kanila, nag-alibwag sila sa pagpanagan apan uwahi na ang tanan ug nakabuto na kini.
Bang! bang! bang! bang! upat ka sipang mga buto ang ilang nadungog. Hinuon, nahimo pa nila ang pagpahilayo sa maong dapit.
“Wala ra koy igo brod!” ni Rodel nga malipayong nagsugid samtang nagpabiling nagpanghikap sa iyang kalawasan.
“Ako pud brod, walay igo!” sa kaubang si Dodoy.
Apan naputol ang mubong pagmaya dihang pipila lamang ka lakang may nabatyagang pamanhod si Rodel sa iyang lawas.
“Brod Rodel, asa man ni gikan ang mga dugo sa imong polo?” may kahibulong ang kaubang si Gako samtang nagtan-aw sa likod nga bahin ni Rodel, nga sama kaniya nakauniporme pa usab.
“Hala mga brod, ang tangkugo ni Rodel naay samad!” matud pa usab sa laing kauban.
Apan ning tungora dili na mahimo pa ni Rodel ang pag-isa sa iyang mga kamot aron unta hikapon ang maong samad ingon man paglakang sa iyang mga tiil. Ug kalit siyang natumba diin inanay usab nga niawop ang iyang panan-aw.
Unya iyang nasuta nga naglakaw siya sa mingaw ug awaaw kaayong palibot. Unya may misugat kaniyang tawo nga nakasutana og puti kaayo. Taas ang buhok ug mga bungot.
Apan wala siya masayod kung ang maong tawo mao na ba ang Ginoo o dili ba kaha si San Pedro sanglit wala kini magpaila kaniya. Bugtong pulong sa tawo mao lamang ang pagmando kaniya.
“Bata pa man kaayo ka dong, pauli lang sa.”
Ug diha-diha dayon mibuka ang iyang mga mata ug misugat kang Rodel ang kahayag. Kahayag gikan sa mga suga nga anaa tungod sa iyang gihigdaan sanglit anaa na siya karon sulod sa ICU ning tambalanan.
“Naluwas pa gyud diay ko, salamat maayong espiritu sa gilugway mong kinabuhi kanako,” tuaw ni Rodel. (Katapusan)