Kay mao may atong hisgotan dinhi ang gimik sa politika, maoy atong unahon ang karon nga line-up sa usa ka partido labi na sa kalungsoran, gikan sa mayor ngadto sa mga konsehal. Ang deadline sa pag-file sa Certificate of Candidacy kaniadto rang Oktubre 5.
Natibuok ang line-up tungod niini ang pikas ug pikas. Apan ang uban dili matawag nga mao gayod ang pinal nga line-up. Naghimo sila’g kompletong line-up aron ikasang-at sa Comelec. Naghimo sila’g gimik pinaagi sa pagpa-file sa usa ka kandidato apan ilisan kini sa Disyembre nga maoy deadline sa replacement. Sa ato pa, ang uban karong partido nangita’g lig-ong kandidato nga ikapuli sa huyang nga kandidato agad sa puwesto nga gikandidatohan.
Mahitabo kini karong Disyembre. Sa maong bulan masayran na sa mga tawo ang tinuod gayod nga mga kandidato sa ilang dapit, gikan sa mayor ngadto sa mga konsehal. Ug ang mga botante anhi na manghimbis sa mga kandidato nga angayang botaran sa eleksiyon sa Mayo sunod tuig.
Laing gimik sa politika mao ang pagpakunhod sa kalig-on sa mga botante nga tua dapig sa kontra. Kasagaran nga mohimo niini mao ang mga kandidato nga anaa sa administrasyon. Moingon sila nga segurado na silang makadaog kay ila ang mga kapitan sa mga barangay, nga solido ang mga botante sa maong barangay nga mobotar ug mosuportar kanila.
Usa kini ka gimik nga sum-ol na, karaan na. Gihimo kini aron ang mga dumadapig sa kontra nilang partido mawad-an og gana ug sa ingon mokuyog ug mobotar na lang kanila.
Apan dili na epektibo karon ang maong matang sa gimik. Dili na motuo ang mga tawo niini ilabi na ang mga batan-ong botante. Dili magpagawong karon ang mga batan-on. Aduna sila’y kaugalingon nga pag-analisar sa matag kandidato kun kinsa niini ang tinud-anay gayod nga moserbisyo sa lungsod.
Bisa’g ang mga ginikanan karon maglisod na sa pagdiktar sa mga anak bahin sa mga kandidato nga botaran. Lig-on ang baroganan sa mga batan-on karon. Nasayod sila nga sila ang paglaom sa nasod.