Tulo ka magduduwa sa NBA gisilotan tungod sa nahitabong karambola

CEBU, Philippines - Ang NBA mipahamtang og multa nilang Greg Monroe sa Milwaukee Bucks ug nilang Nick Young ug D’Angelo Russell sa L.A. Lakers gumikan sa ilang papel sa nahitabong karambola sa ikatulong kuwarter atol sa ilang duwa niadtong Sabado.

Si Monroe gipabayad og $35,000 sa pagtukmod niini ni Young, nga gipamulta sab og $25,000 gumikan sa pagduslit niini sa kagubot sa dihang iyang giduso si Bucks guard Malcolm Brogdon.

Si Russell gipikhan og $15,000 sa liga gumikan sa pag-apil-apil niini sa gubot pinaagi sa pagtukmod ni Monroe.

Ang tulo ka  players gitawgan og technical foul sa nahabiling 36 segundos sa ikatulong kuwarter.

Lain pang pito ka players ang naapil sa gubot, apan karon gitimbang-timbang pa sa mga opisyales kun unsay silot nga isagpa batok kanila.

Ang Bucks midaog sa maong duwa, 107-103  aron hingpit nga putlon ang tsansa sa Los Angeles Lakers nga makaabante sa playoffs. (BANAT NEWS)

Show comments