CEBU, Philippines — Gipaabot nga dunay bigtime rollback sa presyo sa lana karong sunod semana nga moabot og dili momenus P10 kada litro sa presyo sa gasoline ug krudo nga moabot og P3.50 kada litro ug kerosene P3.60 kada litro.
Basi kini sa tulo ka adlaw nga Mean of Platts Singapore trading diin nabantayan ang pagus-os sa kalibutanong presyo sa produktong petrolyo sumala pa sa report sa Philstar.com.
Ang pagtaas sa presyo sa nangaging mga semana, tungod to sa kabalaka sa posibleng pag-atake sa Amerika sa Iran nga dugay nang nagbinayloay og bahad.
Ang Iran mipatuman og blockade sa Strait of Hormuz samtang ang US mipatuman sab og susamang blockade sa mga pantalan sa Iran.
Pipila ka mga oil tankers ug commercial shipping ang naapektahan sa maong kagubot diin pipila nila ang giatake sa Iran, lakip ang mga oil processing depot sa Saudi Arabia ug ubang Gulf States nga kaalyado sa US.
Mao kini ang hinungdan sa pagnihit sa suplay ug nakaapektar sa presyo sa kalibotanong merkado sa lana.
Apan niadtong Miyerkules, napildi ang partidong Republican ni US President Donal Trump sa Democrats. Atol sa midterm elections, daghang mga solidong Republican states nga nibalit-ad, nangapildi ang ilang mga kandidato.
Gawas sa US Senate, nakuha sab sa Democrats ang House of Representatives hinungdan nga dili na makasayon-sayon si Trump nga tumanon ang tanan niyang gusto nga naglakip padayun niyang pakigtigi sa Iran.
Sumala pa sa mga eksperto, ang mga botante sa mga kaniadto solidong balwarte republican states sama sa Texas, Iowa, Ohio ug uban pa, napul-an na aning padayung pagsaka sa presyo sa lana, kurapsyon sa administrasyong Trump ug paghimong stamping pad sa presidente sa mga Republican lawmakers.
Sa pagkapildi sa republicans, napugngan ang mando ni Trump nga bombahan ang Qeshm Island sa Iran.
Tungod sa kadaugan sa Democrats, mababagan ang mga plano ni Trump apil ang mga appointments, mga balaudnon nga gidiktar ni Trump ug gipaabot daghang opisyales nga tinudlo ni Trump lakip sa iyang pamilya nga giingong nisamot og kadato ang imbestigahan.
Tungod pud sa maong hitabo, nakabawi ang Piso sa Pilipinas kontra dolyar niadtong Huwebes, P62.87 batok dolyar.
Ang kamahal sa presyo sa lana ug gastos sa transportasyon sa tanang produkto maoy gitudlong nakapataas sa inflation rate nga 7.8 percent dinhi sa Pilipinas. – IBM BANAT NEWS