CEBU, Philippines — Patay ang 23-anyos nga spearo o mamanaay og isda human giingong nalumos sa Sibonga Wharf sa Barangay Poblacion, Sibonga, Cebu, pasado alas 4:45 sa hapon niadtong Lunes, Oktubre 12, 2026.
Giila sa Sibonga Municipal Police Station (MPS) ang biktima nga si Ronel Angana Anguit, lumad sa Barangay Canyang, Oslob, Cebu, ug kasamtangang nagpuyo sa Barangay Poblacion, Sibonga.
Base sa inisyal nga imbestigasyon sa kapolisan, nakadawat sila og report kalabot sa giingong pagkalumos sa biktima ug dali nga miresponde aron susihon ang insidente.
Sumala sa pahayag ni Charmine Romero, kauban sa trabaho sa biktima, nagpuyo nga nag-inusara si Anguit sa ilang bodega sa Barangay Poblacion.
Matud pa niya, naanad ang biktima sa pagpangisda gamit ang pana, nga kasagaran niyang buhaton sa sayong kabuntagon.
Gikumpirma usab sa CCTV footage sa Sibonga Municipal Hall nga anaa ang biktima sa maong lugar. Apan, wala matino sa inisyal nga imbestigasyon kon unsay hinungdan sa iyang pagkalumos.
Uban sa tabang sa mga personnel sa Disaster Risk Reduction and Management Office (DRRMO) ug Bureau of Fire Protection (BFP), narekober ang biktima ug gidala sa Sibonga Rural Health Unit (RHU), diin gideklarar siyang dead on arrival sa doktor nga mitambong kaniya.
Gibalhin ang iyang lawas ngadto sa Sibonga Funeral Homes alang sa mga kahikayan sa paglubong.
Samtang, gipili sa pamilya nga dili na ipa-autopsy ang lawas sa biktima tungod kay giingong para nila, aksidente ang nahitabo.— IBM BANAT NEWS