CEBU, Philippines — Patay ang usa ka 70-anyos nga lolo human siya gisungay sa usa ka kabaw diha sa Barangay Dapdap, Lungsod sa Pilar, Isla sa Camotes, Biyernes sa hapon, Pebrero 7, 2025.
Ang biktima mao si Samuel Contridas, minyo ug nagpuyo sa naasoy nga dapit. Sa impormasyon sa Pilar Municipal Police Station ang biktima nanguha og kahoy para sugnod sa bukirang dapit sa naasoy nga barangay sa dihang kalit lang kini giatake kabaw.
Matud pa natusok sa sungay sa kabaw ang tiyan niini hinungdan sa iyahang hinanaling kamatayon.
Nakit-an nalang ang biktima sa iyahang mga kabanay nga patay na nianang pagkahapon.
Ang kahoy nga gihigtan sa kabaw naputol gumikan sa kakusgan ug kaagresibo niini sa dihang iyang giatake ang tiguwang.
Ang pamilya sa biktima midawat na sab sa kamatayon sa biktima ug dili na gusto mopasaka og kaso sa tagiya sa maong kabaw.
Mipasalig sab matod pa ang tag-iya sa kabaw ngadto sa banay sa namatay nga motabang sa gastuhan sa haya niini. (BANAT NEWS)