CEBU, Philippines — Ang Office of the Ombudsman-Visayas nakakita og igong basihan aron mohimo og administrative ug criminal investigation bahin sa reklamo batok kang Cebu City Mayor Raymond Garcia ug kaniadto Cebu City Police Office director Antonietto Cañete bahin sa sagunson nga tari sa manbok sa usa ka hotel nga nahimutang South Road Properties sa miaging tuig.
Gimandoan sa Ombudsman ang duha sa pagduso sa ilang counter-affidavits sulod sa napulo ka adlaw gikan sa pagdawat niini kalabot sa reklamong gisang-at ni Kristian Hassamal, nga kanhi opisyal sa Cebu City Hall nga kaalyado kanhi mayor Mike Rama.
“Finding enough basis to proceed with the criminal and administrative investigation of these cases, above-named respondents are hereby ordered to file their counter-affidavits and other controverting evidence to the said complaint filed by KRISTIAN I. HASSAMAL,” sumala pa sa kamandoan gikan sa kopya niini nga nakuha sa The Freeman nga penetsahan og Enero 24, 2025 yet.
Silang Garcia ug Cañete parehong gitawag nga acting mayor sa Cebu City ug acting director sa CCPO diha sa maong kamandoan.
“Failure to comply as herein directed within the period prescribed by the rules, shall be deemed a waiver of the right to present the party's counter-affidavit or reply-affidavit and the investigation shall proceed according to existing rules,” pasabot pa sa Ombudsman.
Gisuwayan og kuha ang habig sa duha apan wala pa sila mohatag og tubag atol sa pagsulat ning balita.
Hinuon si Cañete kinsa usa sab ka abogado, miingon nga “ sub judice” o dili mahimong ibutyag sa publiko, apan kini midugang nga wala pa siya nakadawat og kopya sa kamandoan sa Ombudsman.
Kining maong reklamo may kalabotan kini sa pagpahigayon og derbies sa manok diha sa maong hotel bisan sa pagsupak sa Konseho sa dakbayan. —Jonavie Villa (BANAT NEWS)