CEBU, Philippines — Mayor Raymond Alvin Garcia sa Dakbayan sa Sugbo, padayon nanawagan sa mga adis-adis nga kawani sa dakbayan nga mohunong na sa ilang bisyo human daghan ang nasakpang tiggamitan og ginadili nga drugas.
Ang mayor nipahimangno sa mga kawaning wala pa masakpi sa kinalit nga drug test nga mohunong na, tungod kay walay luna ang ginadili nga drugas sa Cebu City Hall.
Ang mayor nipadayag nga kung gihigugma nila ilang pamilya undangon na nila ang ilang bisyo aron sila mahimong produktibo, epektibo ug episyente sa ilang trabaho.
Ang buhatan sa Cebu City Office on Substance Abuse Prevention kon COSAP nagpadayon paghimo og mga kinalit nga drug test.
Sa laing bahin, walay adis-adis nga polis sa Dakbayan sa Talisay human migawas na ang resulta sa gihimo nga kinalit nga drug test niadtong miaging adlaw.
Si Police Lt. Col. Epream Paguyod, hepe sa kapolisan sa Talisay nibutyag nga nakadawat na siya sa resulta sa eksaminasyon.
Iyang giklaro nga sud sa 90 niya ka sakop nga gipaubos sa drug test ang nag negatibo.
Gituyo ang drug test aron masiguro nga ang tigpatuman sa balaod tinuod nga limpyo sa ilegal nga drugas.
Nagtinguha si Paguyod nga kung mahimo himuon kini katulo sa usa ka tuig.
Gitigom ni Paguyod ang iyang sakop dayon gilahos ang pagkuha sa ilang mga ihi aron sa pagsuta kung migamit ba kini og drugas. (BANAT NEWS)