CEBU, Philippines — Nag-abot ang grupo ni Mayor Patrick Barcenas ug sa kanhi mayor Nice Apura diha sa kiosk o rotunda sa Dakbayan sa Carcar kagahapon sa buntag.
Ang grupo ni Barcenas girepresentahan ni konsehal Harold Nacua ug ni Idol Turagsoy nga usa ka komentarista sa radyo.
Samtang si Apura maoy nangulo sa ilaha uban ang iyang anak nga si kapitan Antoy Apura ug komentarista nga si Arnel Bacalan.
Una niini, nagbinaslanay sa mga komentaryo ang duha ka habig diha sa kahanginan lakip na diha sa social media.
Naabot sa punto nga ang mga nahimo o proyekto sa matag administrasyon na ang ilang gihisgutan.
Ang pagpuli-puli sa pagtingog sa matag habig nakuha sa mga Facebook live nga niani og daghang likes ug comments.
Mingaw pa sa dihang nag-abot ang duha ka habig apan nitapok ang mga tawo pipila ka minutos ang milabay.
Karong Mayo nga piniliay, magpapili pagbalik si Barcenas uban sa iyang bise mayor nga si Atty. Perkins De Dios.
Si Nacua ug si Idol Turagsoy nga maoy nirepresentar sa ilang grupo atol sa tinubagay nagpapili sab pagka konsehal.
Samtang ang moatbang sa ilang grupo mao si kanhi mayor Mercy Apura uban sa iyang bise mayor nga si Efren Quijano, kinsa ka grupo nila ni Barcenas kaniadto.
Ang nirepresentar sa grupo sa mga Apura nga si Nice magpapili kini nga konsehal samtang ang iyang anak nga si Antoy wala ra kini daganan.
Nag-iyahay sa pagpamauli ang duha ka grupo nga walay kasamok nga nahitabo wala sab masayri kun unsay nakab-ot nga kasabotan sa duha ka habig. (BANAT NEWS)