CEBU, Philippines — Nabalhog sa prisuhan ang usa ka 28-anyos nga lalake human gidakop human gipasanginlang nangawat og mountain bike kay iyaha untang ibaligya aron ibayad sa utang, kagahapon sa kaadlawon.
Ang dinakpan mao si Joshua Robis Florendo, 28-anyos , nagpuyo sa Barangay Lugo, Lungsod sa Borbon samtang ang biktima mao si Jay Rene Calledo Flores, 62-anyos, nagpuyo sa Barangay Zapatera, siyudad sa Sugbo.
Gidakop ang suspetsado diha sa General Echavez Street, Barangay Lorega San Miguel, siyudad sa Sugbo apan ang pagpangawat nahitabo sa F. Ramos Street, Barangay Cogon Ramos.
Saysay sa biktima ngadto sa kapulisan nga Pebrero 2 sa alas-4 sa hapon samtang gi-park niya iyahang mountain bike sa usa ka bakery aron mopalit og pan kalit nga gikuha sa suspek ang biseklita ug gimaneho kini padung sa dalan Junquera.
Apan nailhan ang suspetsado pinaagi sa pag-review sa CCTV camera sa Barangay Cogon Ramos.
Alas 2:30 sa kaadlawon kagahapon ang reklamante nakadawat og tawag gikan sa BPSO sa Barangay Cogon Ramos nga nagpahibawo ang suspect nakit-an sa General Echavez Street, Barangay Lorega San Miguel.
Positibong giila sa biktima ang suspetsado nga maoy nagkuha sa mountain bike niini nga na-recover sa Barangay Ermita.
"Bali atong suspek dinakpan na pud na dati dire same gihapon nangawat. According to him nangawat siya kay para daw siya makabayad sa iyang utang," sigon ni Police Captain Mark Eric Papong, hepe sa Abellana Police Station 2.
Gikatakda nga pasakaan og kasong pagpangawat ang suspetsado. (BANAT NEWS)