CEBU, Philippines — Nagpahigayon ang Police Regional Office (PRO)-7 og weeklong operation nga niresulta sa pagkasakmit sa P54.1 milyones nga balor sa ilegal sa nga drugas, mga armas ug pagkasikop sa 319 ka malapason sa balaod sa Central Visayas.
Gidayeg ni PRO-7 officer-in-charge Roy Parena ang police units sa ilahang dedikasyon ilabi na niining holiday season.
Gikan sa Disyembre 13 hangtud sa 15, 2024, ang otoridad nakakompiska og 7.96 ka kilong shabu nga nikantidad tanan ngadto sa P54.1 milyones atol sa ilang 86 ka police operations diin 104 ka drug suspects ang nasikop.
Sa kampaniya batok ilegal nga sugal niabot sa 110 ka sugarol ang nadakpan ug P14,000 ang nakompiska nga pusta.
Lima ka tawo ang nadakpan sa operasyon batok sa loose firearms ug 80 ka armas ug bala ang nasakmit.
Samtang nakasikop usab ang PRO-7 og 100 ka wanted persons sa maong period apil niini ang 14 ka most wanted persons.
Sa laing bahin, usa ka HVI ang nasikop sa Talisay City Police Station diha sa Barangay San Roque sa nahisgutang siyudad sa nilabay’ng kadlawon.
Nikabat ngadto sa P2.5 milyones ang kantidad sa ginadiling drugas nga nasakmit gikan sa 41-anyos nga lalaki.
Ang maong operasyon gipangulohan kini ni Police Lieutenant Colonel Epraem Paguyod, hepe sa Talisay City Police Station.
Matud ni Paguyod nga dinagko nga kantidad ang madispatsar nga ginadiling drugas sa suspetsado. (BANAT NEWS)