CEBU, Philippines — Pagkibhang sa budget nga gitagana alang sa Department of Education makaapektar kini sa ilang operations.
Kini ang gibutyag ni DepEd-7 Director Salustiano Jimenez atol sa pakighinabi kaniya sa mga tigbalita subay sa 2024 Year-End Press Conference.
Matud pa ni Jimenez, makaapekto gayud ang pag cut sa P12bilyon nga budget sa Department of Education ilabi na dako nga pahat sa ilang giduso nga budget gamiton alang sa computerization program.
Dugang pa niya nga ang pagkibhang sa budget sa departamento makahatag usab kini og kalangay sa pag pamalit ug mga kagamitan ilabi na may kalabutan sa digitalization diin dako nga budget ang ilang giduso niini sa rehiyon 7.
Gitug-an ni Jimenez, dako gayud ug tabang ang mga digital nga kagamitan alang sa pag modernize na sa edukasyon ilabi na sa mga hilit-hilit nga dapit sa Central visayas.
Hinuon malaumon ang director nga mahatagan ug consideration ni President Ferdinand "Bongbong" Marcos nga mahibalik ang nakuha nga budget sa ilang departamento.
Lakip sa gitan-aw nga dako nga pahat sa budget mao ang sweldo sa mga magtutudlo nga daghan kaayo sa tibuok Pilipinas. (BANAT NEWS)