CEBU, Philippines — Gikompirmar na sa Cebu City Police Office(CCPO) nga ang 37-anyos nga babaye nga nadakpan sa Carbon Police Police Station 5 sa ilang intensified anti-criminality campaign sa Sitio Bato, Barangay Ermita, siyudad sa Sugbo sa miaging adlaw, apil sa grupo nga mitulis sa duha ka tindahan og alahas sa F. Calderon Street, Barangay Ermita niadtong buwan sa Agosto ning tuiga.
Una niini, nadakpan sa kapulisan si Sherah Llegunas Albina, nga taga Bahabaha, Barangay Poblacion, Lungsod sa Argao ug nakuhaan og 10 gramos nga drugas nga nagkantidad og P68,000.
Apan sa pagkasubay sa background niini nakompirmar sa kapulisan sa siyudad nga duna kini kalambigitan sa nahitabong tulis sa duha ka jewelry stores. Matud ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office na-recover ug nasakmit sa mga operatiba gikan sa dinakpan ang mga resibo sa pag-dispose sa mga alahas sa nagkalain-laing dapit sa Sugbo. "She is one of those who disposed those jewelries that were stolen from DGC's and Macy's," sigon ni Macatangay.
Gawas sa pag disposed sa mga alahas giingong ang dinakpan mao sab ang nitabang sa pagkuha og motorsiklo nga gigamit isip getaway vehicle sa mga tulisan.
Gitan-aw na sa kapulisan kun unsa nga kaso ang ipasaka batok sa suspetsado ug gitigom karon ang mga ebidensiya nga nakuha aron magamit isip suporta sa kaso nga ilang isang-at.
Giklaro ni Macatangay nga wala moundang ang ilang imbestigasyon sa maong pagpanulis ilabi na sa pagsubay kun asa napadulong ang mga alahas nga gikawat. (BANAT NEWS)