CEBU, Philippines — Gikatakda nga makadawat sa ilang tinuig nga insentibo ang kapin sa 45, 000 ka mga barangay volunteers sa Probinsya sa Sugbo gikan sa Kapitolyo, nga karon iagi na sa quick response o QR-coded cards ug dili na pinaagi sa kwarta susama sa niaging mga tuig.
Ang mga Daycare workers, barangay nutrition scholars (BNS), barangay health workers (BHW), ug barangay animal health aides (BAHA) makadawat og QR cards nga adunay sulod nga P6,500; samtang ang mga barangay tanod makadawat og P5,500; ug ang lupong tagapamayapa lakip na ang gender and development (GAD) focal persons makadawat og P2,500.
Si gobernador Gwendolyn Garcia nagkanayon nga pinaagi sa maong sistema, masiguro nga ang pondo sa gobyerno magamit gyud sa tinood nga katuyoan niini.
Gamit ang maong cards, nga adunay pangalan ug ubang detalye sa beneficiary, ang mga volunteer workers sa barangay mamahimong makaadto sa mga partner merchant o tindahan sa Probinsya sa Sugbo aron pagpalit og grocery items sama sa pagkaon ug uban pang gikinahanglan sa pamilya.
Ang maong QR-coded cards dili magamit pagpalit og mga “unessential” nga mga butang sama sa ilimnong makahubog, sigarilyo, cosmetic products ug uban pa. MEL BANAT NEWS