CEBU, Philippines — Usa ka magbabalaod sa dakbayan sa Sugbo ang niduso og kongkretong polisiya ug proteksyon sa kabataan batok sa Online Sexual Abuse and Sexual Exploitation (OSAEC).
Mao kini ang gisugyot nga ordinansahon ni Konsehal James Anthony Cuenco nga nagtinguha sa pagpalig-on sa mga polisiya batok sa OSAEC ug Child Sexual Abuse or Exploitation Materials (CSAEM) sa dakbayan sa Sugbo.
Nagbutang usab kini og mga programa alang sa pagpahunong niini ug pagpahamtang og silot. Gipasa na ngadto sa Committee on Laws and Styling alang sa ilang mga report ug rekomendasyon mahitungod niini.
Apil nga gisugyot nga silot ang P3,000 nga multa ug mandatory OSAEC Seminar sa first offense; P4,000 nga multa ug mandatory OSAEC Seminar alang sa ikaduha offense, ug usa ka P5,000 nga multa ug mandatory OSAEC Seminar o pagka priso sulod sa labing menos unom ka bulan apan dili molapas sa usa ka tuig, alang sa ikatulo nga offense.
Ang mga business establishments nga mapamatud-an nga nakalapas sa bisan unsang mga probisyon sa ordinansa ipaubos sa suspensyon alang sa una ug ikaduha nga offense o pag revoke sa mga permit alang sa ikatulo nga offense o labaw pa. Ang gisugyot nga ordinansa nag-ingon nga ang Ang R.A No. 11930 o ang OSAEC ug CSAEM Act mimando nga ang mga lokal nga gobiyerno mopasar ug ordinansa aron ma-localize ang mga kampanya batok niini.
Ang Local Government Unit (LGU) gimanduan usab nga magtukod ug OSAEC ug CSAEM prevention programs nga nagtumong sa pag-edukar sa mga pamilya.
“The City of Cebu has and continues to demonstrate exemplary child-friendly governance,” mabasa ang kinutlo sa sugyot ni Cuenco.
Kung maaprobahan na, ang giingon nga ordinansa magbantay sa tanang panimalay, internet cafes , ug pribadong business establishments , ahensya sa gobiyerno, ug mga pasilidad niini sulod sa Dakbayan sa Sugbo.
Ang polisiya makatabang kini nga mapugngan nga ma-abuso pinaagi sa sexual exploitation ang mga bata.
Tumong usab sa ordinansa nga mamonitor ang mga online nga negosyo ug uban pang kaalyado nga enterprise, sama sa data providers, money transfers, IT equipment providers, ug internet installers.
Naghatag usab kini og responsibilidad sa mga tag-iya sa mall, operator, ug uban pang mga establisemento nga ipahibalo ang Cebu City Police Office (CCPO) o ang National Bureau of Investigation (NBI) sulod sa 48-oras sa pagkuha sa mga kamatuoran kung adnunay mga online sexual abuse sa mga bata o pagpahimulos nga gihimo sa ilang lugar.
Ang samang ordinansa, kon maaprobahan, maghatag ug gahom sa pag-regulate sa mga internet café o kiosk sa siyudad aron maseguro nga walay kalapasan nga nahimo batok sa OSAEC. (BANAT NEWS)