CEBU, Philippines — Mokabat sa 959 ka mga senior citizen sa Barangay Opao sa Siyudad sa Mandaue ang nakadawat sa ilang P5 mil nga ikaduhang hugna sa pinansiyal nga ayuda alang karong tuig 2024.
Ang pag-apod-apod sa ayuda gipahigayon diha sa Mandaue City Cultural and Sports Complex sa Barangay Centro sa Dakbayan sa Mandaue.
Napahimuslan usab sa mga seniors ang gitanyag nga libreng serbisyo sa kagamhanan nga mao ang libreng pagsakay gikan sa ilang dapit ug hangtod na sa ilang pagpauli.
Si Mayor Glenn Bercede kinsa maoy nangulo sa kalihukan miingon nga sila naglantaw sa kaayohan ug paghatag og tabang sa mga katiguwangan ilabi na sa ilang mga maintenance nga tambal, panginahanglan sa panimalay ug uban pa.
Lakip sa mga serbisyo mao ang libreng medical consultation, dental, libreng tupi, make-up ug pakilay sa MCCTEST, Legal Advices sa City Legal Office, libreng serbisyo sa PSA, SSS ingon man optical services.
Nagpa-raffle usab og bugas humay ug tsinelas ang Mandaue Chamber of Commerce and Industry.
Ang kalihokan gipangulohan ni Mayor Glenn Bercede uban sa mga sakop sa konseho sa siyudad. MEL BANAT NEWS