CEBU, Philippines — Patay ang usa ka lalaki nga giingong nalambigit sa ilegal nga drugas human kini nakigpinusilay sa kapolisan kagahapon sa kadlawon didto sa Sitio Sawsawan, Barangay San Roque, Dakbayan sa Talisay. Ang kapolisan sa Dakbayan sa Talisay nihimo og intelligence monitoring kalabot sa reklamo nga nadawat nila nga adunay ilegal nga kalihokan diha sa maong lugar diin menor de edad ang gigamit aron sa paghatud sa ilegal nga drugas.
Apan sa pagsulod sa mga polis diha sa lugar usa ka ginganlan og “Romel” ang nipusil sa operatiba.
Dali nga nakapasalipod ang mga kapolisan ug nakahigayon sa pagbawos ngadto sa suspek. Ang suspek nakaangkon kini og mga samad pinusilan sa nagdaiyang parte sa iyang lawas sa maong pinusilay.
Matud pa ni Police Lieutenant Colonel Epraem Paguyod, hepe sa kapolisan sa Dakbayan sa Talisay nga gidala nila ang suspek sa Cebu South Medical Center apan gideklara kini sa doktor nga patay na nga naabot sa maong tambalanan.
Nakuha sa kapolisan gikan sa suspetsado ang usa ka revolver nga adunay tulo ka buhing bala, usa ka kabhang, duha ka cartridge nga napabuto ug drugas nga nitimbang og 2.4 gramos nga nibalor ngadto sa P16,320.
Matud usab ni Paguyod nga ang ilang impormante nitug-an kanila nga ang gamiton sa suspek ang mga bata nga nag-edad og 9 ngadto sa 15-anyos isip courier sa ilegal nga drugas diin tagaan sila og 10 porsyento nga komisyon sa kantidad sa shabu nga ilang mahatud.
Nailhan usab ang suspek nga armado ug delikado nga tawo tungod kay mo target kini sa iyang kaatbang sa negosyo ug mangilkil pa kini sa uban nga tigpayuhot og ilegal nga drugas.
Sa laing bahin, patay ang usa ka 20-anyos nga lakaki human kini gipusil diha sa Sitio Kamagong, Barangay Lahug, Siyudad sa Sugbo kagahapon sa kadlawon.
Ang biktima mao si John Michael Ybañez, walay trabaho, nagpuyo sa Back APM, Barangay Mabolo niining siyudad.
Human sa pagpamusil sa duha ka kriminal kinsa nagsul-ob og puti ug green nga t-shirt nanagan kini paingon diha sa Sitio Cabantan, Barangay Luz.
Si Police Major Romeo Caacoy, Jr., hepe sa Mabolo Police Station nagkanayon nga ang biktima napasanginlan nga maoy naghatag og impormasyon sa gipahigayong operasyon sa kapolisan sa niaging mga adlaw.
Ang biktima kinsa giingong nalambigit sa ginadiling drugas gi-transact kini ug gipaadto sa eskina aron kuhaon ang ang item ug didto nahitabo ang pagpamusil. BDB BANAT NEWS