CEBU, Philippines — Gikalipay sa 2,000 ka delivery drivers sama sa Grab, Food Panda, Lalamove, ug Maxim human sila gisaaran ni Cebu City Mayor Raymond Alvin Garcia nga mao nay moabaga sa ilang accident insurance plan diin gipa-waive usab ang delivery permit fee niini ngadto sa Cebu City Transportation Office alang sa tuig 2025 ug gihatagan usab sila og amnestiya sa wala mabayari nila nga mga penalty aron nga makakuha og lisensiya sa transportasyon ug makapanikaysikay sa siyudad.
Ang accident insurance plan ug business permit waiver maoy mga hangyo sa delivery rider nga bag-o lang nakadaog og PHP7.4 million suit atubangan sa National Labor Relations Commission batok sa usa ka food delivery app.
Gipugngan una ang kompensasyon human ang kompaniya niapelar ngadto sa korte.
Dili na usab pabayaran ni Garcia ang natanggong nga mga penalty nga usa sa mga gikinahanglan aron makakuha og ID gikan sa Cebu City Transportation Office (CCTO).
Gipahibalo usab ni Garcia nga giatiman na nila ni Konsehal Pastor “Jun” Alcover ang pagpakigsabot sa usa ka lokal nga insurance underwriter aron mahatagan usab og accident insurance ang liboan ka habal-habal driver sa siyudad dakbayan.
Apan human sa personal nga pagpakighinabi sa mga delivery driver nadesisyonan ni Garcia nga ilakip lang kini sa accident insurance coverage nga plano niyang bayaran pinaagi sa iyang kaugalingong pundo.
Si Garcia makigtagbo kini sa konseho sa mga motorcycle rider nga naglangkub sa habal-habal riders ug lakip usab ang mga delivery riders aron matuki ang mga isyu nga makaapekto sa ilang operasyon sa siyudad.
Lakip sa tukion mao ang sa pag-require sa mga nagkadaiyang delivery platform nga mokuha og business permit ug magmontar og pisikal nga buhatan sa syudad.
Tukion usab ang shadow banning o pagbutang og mga restrictions sa mga delivery booking nga nakahatag og negatibong epekto sa kita sa mga delivery rider.
Naglaom si Garcia nga unta masolusyonan ang mga problema nga giatubang sa mga nagkadaiyang kompaniya sa delivery aron nga hapsay ang negosyo niini sa siyudad. BDB BANAT NEWS