CEBU, Philippines — Kural sa usa ka mini-grocery store sa kilid sa sapa sa Barangay T. Padilla sa Cebu City gisugyot ni Konsehal Jerry Guardo nga ipaguba aron mabawi ang tres metros nga easement zone sa sapa nga maoy nalatid sa balaod.
Sa report sa Cebu City News and Information, namugna ang maong sugyot human gisusi ni Guardo ang koral kauban ang barangay kapitan sa Barangay Day-as nga si Freddie Esmas, ang labaw sa Prevention, Restoration, Order, Beautification, and Enhancement (PROBE) Team nga si Retired Gen. Aderson Comar, mga tinugyanan sa Task Force Gubat sa Baha ug ang mga representante sa maong tindahan niadtong miaging semana.
Si Kapitan Esmas miingon nga kuyaw sab sa peligro ang mga tawo sa luyong bahin sa maong kural ilabi na kun dunay emehensiya ilabi na kun mahitabo kini panahon sa gabii sama sa sunog kay delikado kini sa stampede.
Gidayeg hinuon ni Guardo ang management kay dili kini labad ikasabot. Gani, nisuporta sab sila sa flood control project nga gi-implementar sa Department of Public Works and Highways (DPWH) sa maong dapit. Naghuwat lang sab kini sa detailed plan gikan sa DPWH.
Gipanglantawan ni Guardo nga masugdan na og pagpatuman ang tres metros nga easement sa sapa sa sunod tuig kun molusot na ang pundo sa DPWH. (BANAT NEWS)