CEBU, Philippines — Si Cebu City Mayor Raymond Alvin Garcia mipasabot nga igo lang siya nituman sa kamanduan sa Ombudsman ug DILG nga siya ang molingkod isip mayor sa Dakbayan sa Sugbo agi og iyang tubag sa padayon nga pagkuwestyon sa kampo ni dismissed mayor Michael Rama sa iyang posisyon sa gobyerno.
“Kaning atong gibuhat karon, pagsubay ra man ni sa balaod, sa balaod sa Ombudsman ug sa DILG. I don’t want to add to the tension and commotion for that drama,” padayag pa ni Garcia.
Si Garcia namahayag niini human sa tensyon tali sa duha kampo human nga nipatim-aw ang mga abogado ni Rama uban ang mga supporters niini ug nagpahigayon og rally ug press conference sa City Hall kagahapon.
“Unless we get another decision coming from either or memorandum coming from the Ombudsman or the regular courts or the DILG, then that’s the only time nga we will act accordingly,” suma pa ni Garcia.
Sa pagkakaron, dako og pagtuo si Garcia nga legal tanan niyang gipangbuhat isip mayor sa dakbayan.
Dako sab ang pagsalig ni Garcia nga kahibalo na ang mga empleyado sa City Hall kung kinsang otoridad ang angayan nga sundon.
“They can file motion for reconsideration sa Ombudsman, they can go to higher courts… that is their right to do so. That’s better for the proper venue and proper forum nga ilang adtuan para ma-address ang ilang grievance, ayaw lang gyud diri sa City Hall,” tambag pa ni Garcia nilang Rama.
Human sa nahitabong komosyon, nimando si Garcia sa hepe sa Cebu City Police Office nga si Antonietto Cañete nga imentinar ang peace and order dili lang sa syudad apan lakip na sab sa City Hall.
Dugang pa ni Garcia nga wala siya nagdili sa mga buot nga mopadayag sa ilang kaligutgot sa iyang administrasyon.
“It’s business as usual here in the City Hall kay dili gyud ko ganahan nga mabalda ang operasyon sa Cebu City Hall because we are here to serve the public and people who put us here,” padayag ni Garcia. —/IBM (BANAT NEWS)