CEBU, Philippines — Sikop ang usa ka embalsamador ug kaubang 16-anyos nga menor de edad human sila naaktohang nangawat og water cable cord diha sa South Road Properties, Barangay Mambaling, siyudad sa Sugbo sa miaging adlaw.
Ang mga nadakpan mao si alyas Atan, 30 anyos nga taga Sitio Kalubihan, Barangay Basak San Nicolas nga usa ka embalsamador sa usa ka punerarya ug ang kauban niini nga 16-anyos nga lalake.
Ang nga suspetsado nasakpan sa gwardiya sa pribadong water supplier ug gitugyan sila sa Mambaling Police Station 11 sa Cebu City Police Office.
Matud pa giputol ug gitago sa mga dinakpan ang kable sa sakyanan sa punerarya nga gitrabahoan ni Atan. Kapin sa P400 mil ang balor sa cable wire nga gikawat matud pa sa mga dinakpan. Sa impormasyon sa kapulisan ang menor de edad giingong natadong kawatan sa dapit kay makapila na kini gabalik-balik sa police station ug giingong maoy nigalgal kang Atan nga mangawat.
Nahibulong sab matod pa ang tag-iya sa punerarya tungod kay kada buntag giingong mawala ang sakyanan sa parking area bisan og wala'y customer.
Nasayran nga ang maong pribadong water supplier daghan na og nawagtang nga butang hinungdan nga gisubay sab sa kapulisan kun ang duha maoy naghimo niini. IBM BANAT NEWS