CEBU, Philippines — Si Mayor Raymond Alvin Garcia nisugyot nga gawas sa nominasyon ni Atty. Mikel Rama isip mahimong kabahin sa ika-16 nga Sangguniang Panglungsod sa Dakbayan sa Sugbo mas maayo nga mag-nominate ug magsumiter og mga pangalan ngadto sa Department of Interior and Local Government (DILG) sa mga beteranong sakop sa konseho.
Giklaro ni Garcia nga dili siya babag sa nominasyon ni Atty. Mikel. Gani, gikonsiderar pa kini niya nga kwalipikado kaayo nga kandidato nga mohulip sa nabakanteng posisyon human nga nahimong bise mayor sa siyudad si Konsehal Donaldo Hontiveros.
“Atty. Mikel is very qualified. He is a lawyer and it is a good thing to have a lawyer in the council kay ang trabaho sa usa ka legislator kay maoy mopanday og balaudnon. I don’t see anything wrong with the recommendation of Atty. Mikel but to be fair to other parties, let’s submit more names”, pasabot ni Garcia.
Gisugyot ni Garcia nga mag-nominate gikan sa duha ka partido nga gikan sa Bando Osmeña – Pundok Kauswagan ug sa Kugi Uswag Sugbo (KUSUG).
Si Tumulak ug Daluz kanhi mga konsehal na sa Dakbayan sa Sugbo.
Kasamtangan si Tumulak maoy kapitan sa Barangay Basak Pardo ug si Daluz mao ang kanhi chairman sa Metropolitan Cebu Water District Chairman ug karon mao ang running mate ni Garcia sa umaabot nga piniliay sa 2025.
Dugang pangalan nga gisugyot ni Garcia mao si Engineer Jun Gabuya gikan sa BOPK.
Matud usab ni Garcia nga aduna gyu’y husto nga proseso nga sundon diin moagi pa gyud sa DILG tungod kay girekomenda ug naaprobahan na sa Sangguniang Panglungsod ang pangalan ni Atty. Mikel ug isumite na kini sa buhatan sa presidente alang sa pagtudlo niini aron makasulod na sa konseho.
Nasayran nga nakaduso na usab si Atty. Mikel sa iyang Certificate of Candidacy aron magpapili isip konsehal ubos sa Partido BARUG-Team Rama ug BagOng Sugbo kinsa ang standard bearer niini ang iyang amahan nga si dismissed mayor Michael Rama. BDB BANAT NEWS