CEBU, Philippines — Gihulagway sa Bureau of Fisheries and Aquatic Resources (BFAR) Region 7 nga healthy o naa sa maayong kahimtang ang kadagatan nonot sa pagdagsa sa mga isdang toloy nga nasinati sa kabaybayonan sa panagsama lungsod sa Moalboal.
Suma pa ni Johann Tejada ang Technical Assistant sa BFAR-7 nga walay angay kabalak-an ug mas angayan kini nga ipasalamat kay nagpasabot kini nga healthy ang kadagatan sa maong dapit.
Niadtong Huwebes usa ka post sa netizen ang ni trending online human sila namunit sa mga isdang toloy nga niabot na sa baybayon.
Gipasabot usab ni Tejada nga malampuson nga napatuman ang close season niadtong Nobiyembre sa nakalabay nga tuig hangtud niadtong nakalabay nga buwan sa Pebrero karong tuiga. Lakip usab sa gitan-aw nga hinungdan sa pagdagsa sa daghang gagmay'ng isda mao ang predator-prey relationship.
Padayon ang awhag sa BFAR nga mosunod gayud kung magpatuman na usab og close season karong buwana diin gidili na usab ang pagpangisda sa tanon strait.
Matud pa sa usa ka netizen niadtong Huwebes ika-upat kini nila nabantayan nga nidagsa ang isda nga toloy gikan sa alas singko y media ngadto na sa alas nuybe sa buntag. Dili mominos sa lima ka higayon nga nidagsa ang mga isdang toloy sa baybayon sa panagsama sa Basdiot sa Lungsod sa Moalboal sa milabay nga semana lang.
Laing upload nahitabo usab Domingo sa buntag usa ka netizen nga si Michael Gempero nagpakita usab online sa gasinaw-sinaw nga baybayon gumikan sa kadaghang gagmay'ng isda nga subling nidagsa. (BANAT NEWS)