CEBU, Philippines — Moabot sa 13 ka mga homeowners sa Lot 1119 Nivel Hills Homeowners Association sa Barangay Apas sa Dakbayan sa Sugbo nakadawat na sa ilang Deed of Absolute Sale gikan sa Division for the Welfare of the Urban Poor human sa pipila ka tuig nga pinaabot.
Ang pangu sa HOA nga si Gloria Poloyapoy nagpasalamat ngadto kang Mayor Raymond Alvin Garcia gumikan kay nadungog na gyud ang ilang hangyo.
Matud pa ni Poloyapoy nga si kanhi mayor Alvin Garcia maoy nipalit sa maong yuta nga ilang gipuy-an ug karon ang anak niini nga si Mayor Raymond Alvin Garcia na ang nipirma sa ilang Deed of Absolute Sale.
Mapasalamaton usab si Poloyapoy ngadto sa pangu sa DWUP nga si Atty. Ronald Anthony Librando gumikan kay bukas ang pultahan niini sa pag-atiman kanila aron maproseso ang ilang mga hangyo.
Si Atty. Librando nagkanayon nga unang batch pa lang ang 13 ka homeowners ang nakadawat sa maong Deed of Absolute Sale ug aduna pay umaabot nga hataganan sab.
Karon nga nakahatag na sila sa Deed of Absolute Sale, isunod nila og proseso ang indibidwal nga mga titulo sa matag homeowners. MEL BANAT NEWS