CEBU, Philippines — Gilauman nga matuman sa tuig 2025 ang gisugyot nga pagtukod sa building sa Department of Veterinary Medicine and Fisheries (DVMF) nga maglakip sa usa ka city-owned veterinary hospital.
Suma pa ni Doctor Alice Utlang, pangulo sa Cebu City DVMF nga nangayo sila og laing P30 milyones nga budget aron maapil ang improvement ingon man ang pagdugang og mga tangkal sa hayop sa ilang impounding facility.
Dugang niya nga aduna nay naaprobahan nga P30 million gikan sa 2025 budget alang sa first floor nga karon gikatakda na ang bidding sa contractor.
Lakip sa ilang giplano sa maong building mao ang pagbutang og Veterinary Clinic and Hospital.
Sa pagkakaron, ang DVMF nahimutang sa karaan nga ihawan diha sa Barangay Mabolo diin naguba ang pipila ka parte niini atol sa Bagyong Odette.
Sa pagkatukod sa city-owned veterinary hospital, si Utlang niingon nga kini gitinguha nga mo-mirror sa mga serbisyo nga gitanyag sa mga pribadong tambalanan. Matod niya, kung ang city veterinary clinic maka-accommodate ug daghang mga binuhi, mahimo nilang ma-cater ang mga strays nga nanginahanglan og tabang.
Sa laing bahin, si Utlang nipadayag og kasagmuyo human mahibaw-i nga ang mga nipahimulos sa libreng spay ug neuter sa mga binuhi kasagaran dili taga dakbayan sa Sugbo apan nigamit lang og mga residente sa dakbayan.
“Di man nga mag dinalo ta, pero unfair sa mga Sugbuanon o sa mga binuhi nga taga Cebu City, di na nuon ka maka-avail,” matud ni Utlang.
Kagahapon sa hapon, gi-refer sa Cebu City Council ang P17 bilyones nga proposed annual budget nga naglakip sa proposal sa P30 milyones nga dugang alang sa DVMF building, ngadto sa Committee on Budget and Finance alang sa ilang mga rekomendasyon. (BANAT NEWS)