CEBU, Philippines — Usa ka tulo ka andana nga adunay unom ka mga classroom ang itukod alang sa Cebu Technological University (CTU) Toledo Campus.
Matud ni Toledo City Mayor Marjorie Perales giaprobahan ni gobernador Gwendolyn Garcia ang paggahin og pondo alang sa katukoran sa maong school building nga adto ipahimutang sa Brgy. Sangi sa maong dakbayan.
Si kongresista Pablo John "PJ" Garcia maoy miduso og balaod alang sa pag establisar og laing CTU campus sa siyudad sa Toledo.
Samtang ang LGU na ang naninguha aron ma comply ang tanang rekisitos alang sa katukoran sa maong eskwelahan. Kasamtangang gigamit sa CTU- Toledo ang Toledo Sports Center isip maoy tunghaan sa kapin 700 ka mga enrollees niini.
Ang LGU nagpasalamat tungod kay pinaagi sa itukod nga school building mahatagan na og sakto nga skwelahan ang mga tinun-an sa siyudad ug silingang lungsod ug mapalapdan na ang paghatag og kalidad nga edukasyon. (CEBU NEWS)