CEBU, Philippines — Duha ang patay sa managlahing insidente sa pagpamusil sa Dakbayan sa Carcar niadtong Miyerkules sa gabii ug kagahapon sa buntag adlaw nga Huwebes.
Niadtong Miyerkules sa gabii, kalit gipusil og wala mailhing tawo ang 36-anyos nga job order employee sa Carcar City nga nadestino sa Bureau of Fire Carcar samtang kini naglakaw diha sa Camomot Street, Barangay Poblacion 1. Ang nakalas naila nga si Johndy Larrobis Alcoseba, 36, residente sa maong dapit. Gikatahong gikan nakig-inom sa mga ig-agaw ang biktima ug padung na kini mopauli sa dihang kini gibanhigan dihang duol na kini sa ilang balay. Ang kaparyentihan niini dali nga nidala kaniya sa Cebu Provincial-Hospital sa Carcar City apan nakabsan gyud sa kinabuhi.
Matud pa ni SFO2 Romeo Urgel, sa Carcar City Fire Station miingon nga buotan ug kugihan ang biktima.
Samtang patay sab ang usa ka 65 anyos nga senior citizen human kini gipusil sa wala pa mailhing tawo diha sa Sitio Karay Baracca, Barangay Poblacion 3, Dakbayan sa Carcar kagahapon sa buntag.
Ang biktima mao si Emmanuel Alcuizar, 65, residente sa nahisgutan nga lugar. Ang mamumuno nagsul-ob og puti nga jacket nga dunay hood.
Base sa imbestigasyon sa Carcar City Police Station galawog kini sa iyahang mga binuhing manok sa dihang giduol sa mamumuno ug gipusil kini sa ulo. Daling niikyas ang maong lalaki sakay og motorsiklo. Sa pagkutlo ning balita padayon ang imbestigasyon sa kapulisan sa maong duha ka pagpamusil. — IBM BANAT NEWS