CEBU, Philippines — Gibalhog sa prisuhan sa Waterfront Police Station 3 sa Cebu City Police Office ang upat ka mga tawo nga matud pa ilegal nga mang-notaryo og mga dokumento diha sa D. Jakosalem Street, Barangay Sto. Niñ, siyudad sa Sugbo atbang sa Cebu City Hall.
Nagkanayon si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga ang maong aksyon gipangulohan sa Cebu City Notarial Commission tungod kay ang mga tawo nga nang-notaryo dili mga notary public.
Ang notary public mga abogado kini nga gihatagan og pagtugot o authority sa korte nga mohimo sa usa ka private document nga public document ug nagsilbi sab kining notisya nga nag-exist ang maong dokumento sa higayon nga kini manotaryohan.
"From what I've gathered, kana sila nadakpan gyud na sila nga ni falsify, nikopya, ni-imitate sa mga pirma sa mga abogado,” matud pang Macatangay.
Apil sa gisusi ang mga impormasyong dunay mga abogado nga nipagamit sa ilang mga pangalan, pirma ug selyo anang tawo nga ilegal nga nang-notaryo. Ang mga nadakpan pasakaan og kasong falsification of public documents. — IBM BANAT NEWS