CEBU, Philippines — Pito ka mga libudsuroy nga Badjao ug tulo niini menor de edad ang na-rescue sa sa Cebu City Anti-Mendicancy Board ug Cebu Environmental Sanitation and Enforcement Team human masakpi nga nagpakilimos diha sa kadalanan sa siyudad kagahapon.
Matud ni Grace Luardo, pangulo sa CESET nga nasayran nila nga gigamit ang mga menor de edad nga puhonan sa ilang mga amahan ug mga igsuon nga magpakilimos diin pasakyon kini sa mga pampubliko nga mga jeep ug padunolon og mga sobre aron didto isulod ang mga limos.
Ang mga libudsuroy kasagarang makit-an diha sa dalan Leon Kilat ug Colon.
Si Luardo nagkanayon nga gihatagan nila og pito ka adlaw ang mga menor de edad sa pagbalik sa ilang buhatan sa CESET uban ang ilang mga ginikanan.
Ug kong dili kini motuman sa ilang sabot pasakaan nila kini og kasong kalapasan sa City Ordinance No. 1631.
Ang maong ordinansa nagsilot kini sa mga masakpan nga mohatag og limos ug nagdili kini sa pagpakilimos og kwarta o bisan unsa nga matang sa butang diha sa pampubliko nga lugar sa siyudad.
Sa usa ka semana nga paglibot-libot sa CESET ug CCAMB sa siyudad niabot sa 19 ka libud-suroy ang na-rescue ug naatlan kini nga nagpakilimos diha sa may city hall, Barangay Talamban, Leon Kilat ug Colon.
Nipahinumdom usab si Dr. Lucille Mercado, hepe sa CCAMB nga kadtong mga masakpan nga mohatag og limos sa mga libudsuroy pamultahon kini og P1000 o ipaubos sa upat ka oras nga community service. — BDB BANAT NEWS