CEBU, Philippines — Nakuha sa Tribu Lumad Basakanon sa Barangay Basak San Nicolas, Dakbayan sa Sugbo ang pagka-champion sa Kasanggayahan Festivals 2024 National Festival of Festivals Grand Showdown Competition ngadto sa Sorsogon Province niadtong Miyerkules.
Gawas sa pagka-champion nakuha usab nila ang best in moving choreography ug best in costume.
Nasayran nga nikabat ngadto sa P4.5milyones ang premyo nga nadala sa grupo.
Samtang ang Garbo sa Lapu-lapu Festival sa Dakbayan sa Lapu-lapu napili kining 4th runner up ug nakadawaat og P500 mil nga premyo.
Matud ni Mayor Junard "Ahong" Chan nga dako kaayo nilang dungog nga mga Oponganon nga unang higayon palang nilang niapil sa maong national festival of festivals nga giapilan sa lain-lain dapit sa Pilipinas napili sila nga 4th runner up.
Gipadayag ni Chan nga nagpasalamat siya sa Ginoo ug sa Birhen sa Regla sa paggiya sa tanang performers nga nibiyahe padulong ngadto sa Sorsogon hangtud sa ilang pag-perform.
Mapasalamaton usab si Chan sa iyang tourism officer nga si Garry Lao ug artistic director Niel Tan ug sa tanan sa ilang kadaogan nga matawag og “Kadaugan sa Mactan”. — BDB BANAT NEWS