CEBU, Philippines — Nasakmit atol sa gipahigayong buy-bust operation sa mga operatiba sa Philippine Drug Enforcement Agency (PDEA)-7 ang lima ka kilo nga shabu diha sa Cokaliong Street, Barangay Carreta, siyudad sa Sugbo kagahapon sa hapon.
Nadakpan ang subject sa operasyon nga si Maria Christine Gonzales Abarquez, 51- anyos, residente sa Barangay Cogon Pardo niining siyudad.
Nasakmit gikan sa suspetsado ang lima ka kilo nga shabu nga nikantidad tanan ngadto sa P34 milyones.
Nasuta nga si Abarquez maka-dispose kini og lima ka kilo nga shabu matag semana.
Giingong ang area of operation sa suspetsado dili lang Cebu City lakip na ang mga dakbayan sa Mandaue ug Lapu-Lapu.
Nasuta usab nga niadtong tuig 2016 nadakpan ang suspetsado gumikan gihapon sa kalambigitan sa ilegal nga drugas.
Samtang kanhi media personality ang nasikop usab atol sa buy-bust operation sa PDEA-7 diha sa Sitio Laguna, Barangay Lorega-San Miguel, Siyudad sa Sugbo kagahapon usab sa hapon.
Ang suspetsado mao si Cherrie Mae Opura Rabor, 35, residente sa maong dapit giingong kanhi media personality
Nasakmit gikan kang Rabor ang 15 gramong shabu nga nikantidad og 102,000. Si Rabor kasamtangang gibalhog sa detention facility sa PDEA-7 diin mag-atubang kini og kasong kalapasan sa Section 5 og Section 11 sa Akta Republika 9165 kun “Comprehensive Dangerous Drugs Act of 2002”.
Gikataho nga si Rabor nasikop kini niadtong tuig 2019 gumikan gihapon sa pagkalambigit niini sa ilegal nga drugas ug nakagawas human nipaubos sa plea bargaining.
Sa laing bahin, nikabat ngadto sa P2 milyones ang balor sa ilegal nga drugas ang nasakmit sa kapolisan atol sa managlahi nga operasyon sa mga police station sa Probinsiya sa Sugbo niadtong Huwebes.
Ang Toledo City Police Station nipahigayon og buy-bust operation mga alas 3:14 sa hapon sa maong adlaw diha sa Purok Tambis, Barangay Dumlog, Dakbayan sa Toledo.
Nasikop ni Dojiemar Bacasmas Cabante, 31, walay trabaho, residente sa nahisgutang lugar.
Nasakmit gikan sa suspetsado ang 125 gramong shabu nga nikantidad ngadto sa P850,000.
Sa samang adlaw, nasikop usab atol sa buy-bust operation sa Naga City Police Station si Liele Dinolan Quita, 39, taga Purok Oceanside, Barangay Poblacion sa maong siyudad.
Nasakmit sa kapolisan gikan sa suspetsado og 90 gramo nga shabu nga nibalor ngadto sa P612,000. BDB BANAT NEWS