CEBU, Philippines — Patay ang usa ka 52-anyos nga ginang human kini gitagod-tagod og tigbas sa iyahang silingan diha sa Purok Manga 2, Barangay Pajo, Lungsod sa Daanbantayan kagahapon sa udto, Oktubre 7, 2024.
Ang biktima mao si Necitas Marijuan Abing, 52, residente sa Purok Manga 2, Barangay Pajo sa maong lungsod samtang ang suspek mao si Alfonso Tundag Jr., silingan sa biktima.
Sa impormasyon sa Daanbantayan Police Station ang nawong ug ubang parte sa lawas sa biktima napuno sa samad tinigbasan ug ang tuong bukton niini naputol nga gituohang resulta sa pagpanagang niini. Ang biktima nagbalhin unta sa iyahang binuhing baka ug kanding sa gitugwayan diha sa umahan apan giduol kini matud pa sa suspek nga giingong adunay deperensiya sa panghuna-huna ug walay daghang estorya gidiretso og tigbas ang biktima makadaghang higayon.
Giingong dunay duha ka tiguwang nga nakasaksi sa krimen apan wala silay nabuhat tungod sa kahadlok hinungdan nga nanagan nalang sila ug nangayo og tabang sa mga silingan.
Nidagan matod pa ang suspetsado sa kalibunan apan nadakpan dayon kini sa kapulisan. Wala'y bangi ang biktima ug suspek. Gikatahong magsuol-suol ang sakit sa maong mamumuno.
Kasong murder ang ipasaka batok sa suspetsado. (BANAT NEWS)