CEBU, Philippines — Gipatuman na sa Basilica Minore del Sto. Niño ang dress code sa mga deboto nga mosulod sa simbahan hinuon daghan sa wala makasulod ang nakasabot ra sa gipatuman nga policy.
Sugod kagahapon, October 1, 2024 gipatuman ang bag-ong palisiya Basilica ug kadtong wala gyud makatuman wala tugoti nga makasulod.
Base sa gipatuman nga dress code, gidli ang pagsul-ob sa spaghetti straps; tube; tank tops; sleeveless; plunging neckline; shorts skirts/crop tops; bisan unsa nga matang sa shorts; low waist pants/ripped jeans; racerbacks;ug bareback.
Dunay magtiayon nga gikan pa sa lungsod sa Minglanilla ang mosulod unta sa simbahan aron modagkot ug mosimba sa unang adlaw nga natawhan sa ilang anak apan wala sila pasudla tungod kay dili tukma ang ilang gisul-ob hinungdan diha nalang sila sa gawas.
Ang magtiayon wala masayod sa bag-ong patakaran tungod kay panagsa lang sila makabisita sa Basilica. Hinuon nakasabot ra sila tungod kay sakto man usab ang gipatuman nga guidelines.
Adunay mga domestic tourist nga unang higayon nga mibisita sa Basilica ang wala usab makasulod tungod kay puros naka shorts.
Si Ismael Buante Jr. ang detachment commander sa Basilica nibutyag nga taod-taod na gipahibalo ang kabahin sa dress code ug igo lang sila nituman sa kamanduan sa ilang mga labaw. (BANAT NEWS)