CEBU, Philippines — Nagtingkagol sa prisohan ang upat ka lalaki kinsa nadakpan dihang giaksiyonan sa Labangon Police Station sa Cebu City Police Office ang reklamo sa kasaba sa mga nag- derby og kaka diha sa Doña Maria 1, Barangay Punta Princesa niadtong Martes sa gabii.
Ang mga nadakpan mao sila si John Kent Antoque Teogangco, 41-anyos, taga Barangay Poblacion, Lungsod sa Sibonga; Kirby Catulong Da-al, 24, nagpuyo sa B. Rodriguez, Barangay Sambag 2, Cebu City; Larever Morastill Cabahug, 53, taga Doña Maria 1, Barangay Punta Princesa; Leomar Pancho Padigos, 31, nagpuyo sa Doña Maria 1, Barangay Punta Princesa samtang nakaikyas si Jovie Estaniel.
Nagkanayon si Police Major Eraño Regidor, hepe sa Labangon Police Station nga daghan ang nitawag sa ilang buhatan gumikan sa kasaba sa mga nagsugal og kaka.
Gawas niini, gireklamo usab nga daghang mga bata motan-aw sa maong matang sa sugal hinungdan nga ilang giaksyonan.
"Mao naman gud poy nauso karon, problema kay gihimo naman sugal...Usually gabii ang dula kay mostly sa mga manan-aw og magsugal ky work sa buntag..unya init pod og buntag magpaaway..unya mga bata mangawas napud ky mutan-aw sa mga away sa kaka", matud ni Regidor.
Nasakmit sa kapolisan ang kapin P2,000 nga pusta, duha ka box nga adunay sulod nga 12 ka kaka ug improvised spider ring nga dunay pisi.
Kasong kalapasan sa Presidential Decree 1602 o illegal gambling ang ipasaka batok sa mga suspetsado. — BDB BANAT NEWS