CEBU, Philippines — Nipahimangno ang kapolisan sa siyudad sa Talisay ngadto sa katawhan nga di magpataka og post og dili beripikado nga impormasyon.
Ang kapolisan pinaagi sa ilang Facebook Page nianunsyo niini aron ang katawhan dili malisang o magpanic sa mga kasayuran nga ilang mabasahan diha sa social media.
Una niini, tulo ka batan-on ang sunod-sunod nga gipangita tungod kay wa makauli sa ilang panimay apan sa kauwahian nipauli ra og walay dautang nahitabo. Gipost kini sa social media hinungdan sa kabalaka sa katawhan nga nakabasa.
Sa pagsusi sa otoridad ang usa ka batan-on nakit-an og kini nikuyog lang sa iyang mga barkada.
Ang usa sab ka batan-on nauli ra sa ilang panimay ug nahibaw-an nga nikuyog ra kini sa iyang uyab.
Samtang ang ikatulo nga batan-on nisibat lang sa ilang panimay kay nagka away sa iyang kauban sa balay.
Ang kapolisan nitambag nga kung aduna man gani impormasyon labot sa mga panghitabo isumbong kini sa otoridad sa dili pa mohimo og pahibawo sa kadaghanan aron masuta kun tinuod ba kini o dili.