CEBU, Philippines — Konektado sa Porojinog robbery group ang upat ka tulisan kinsa nisakiyo sa P15 milyones nga balor sa mga alahas sa duha ka pawnshop diha sa F. Calderon Street, Barangay Ermita, Siyudad sa Sugbo niadtong Agosto 8, 2024 kini base sa taho sa kapolisan.
Si Police Lieutenant Colonel Maria Theresa Macatangay, tigpamaba sa Special Investigation Task Group nagkanayon nga ang maong grupo dili taga Sugbo ug giingong mokuha lang sila og local personality nga motabang kanila aron mangita og biktimahon.
Nailhan na sa kapolisan ang upat ka tulisan diin apil na niini si Marcial Ponesto ang drayber sa Mitsubishi Adventure nga usa sa mga getaway vehicles sa mga tulisan ug na-recover ang maong sakyanan diha sa Barangay Paknaan, Dakbayan sa Mandaue niadtong Martes sa gabii.
Gikataho nga ang tag-iya sa sakyanan usa ka lalaki nga police officer nga nagranggo og Police Master Sergeant ug nadestino ngadto sa Luzon. Tinguha sa kapolisan nga karong Biyernes masang-at nila ang mga kasong robbery in band, kalapasan sa Akta Republika 9165 kun “Comprehensive Dangerous Drugs Act of 2002 ug Akta Republika 10591 kun “Comprehensive Firearms and Ammunition Regulation Act” ug paghupot og explosibo.
Matud ni Macatangay nga gikan sa Luzon ang sakyanan ug tinuod ang impormasyon nga ang police officer ang usa sa mga suspect kinsa on-leave sa sa adlaw nga nahitabo ang pagpanulis ug adunay dokumento ang kapolisan pagpamatuod niini. Gikataho nga lain na ang tag-iya sa sakyanan tungod kay gibaligya na apan matud usab ni Macatangay nga atol sa insidente sa pagpanulis ang sakyanan ubos pa sa pangalan sa maong police officer.
Sayo pa, natultolan sa kapolisan ang sakyanan pinaagi sa footages sa closes circuit television nga ilang nakuha gikan sa private agencies ingon man sa mga informant ug tabang sa mga residente sa lugar.
Nasyran nga gibutang sa mga tulisan ang ilahang mga kinawat nga mga alahas ug mga high powered firearms diha sa nahisgutang sakyanan.
Gipadayag ni Macatangay nga gi-hot pursuit nila ang sakyanan sukad sa pagkahitabo sa krimen ug si Marcial giingong ang nagmaneho sa wala pa ang nahitabo ang krimen ug siya usab ang drayber dihang gi-survey nila ang ilang targets ug siya usab ang driver dihang nahitabo na ang insidente.
Nunot niini, gidayeg ni Acting Cebu City Mayor Raymond Alvin Garcia ang Cebu City Police Office tungod sa kapaspas niini sa pagsulbad sa nahisgutang insidente. — Rowena D. Capistrano ug Romeo T. Limpangog/BDB BANAT NEWS