CEBU, Philippines — Nihangyo ang National Food Authority- 7 ngadto sa Probinsiya sa Sugbo nga maoy modumala sa bag-ong programa sa ahensiya nga “Program 29” o giila usab nga “Bigas 29”.
Sa maong programa tinguha sa NFA ang pagbaligya sa bugas sa P29 matag kilo ngadto sa mga sektor nga vulnerable sama sa persons with disability (PWD), solo parents, senior citizens, ug indigenous people.
Ang OIC regional manager sa NFA-7 Ovelito Baritua nihangyo niini ngadto kang Gobernador Gwendolyn Garcia atol sa pagbisita niini sa Kapitolyo niadtong Agosto 12, 2024.
Gidawat usab ni Garcia ang maong hangyo sa NFA-7 ug nisaad nga motabang ang Kapitolyo sa pagpatuman sa maong programa aron kini molungtad.
Ug kong hingpit na kini nga mapatuman ang maong programa i-integrate sa kasamtangang QR-coded card system sa probinsiy aron masiguro ang hapsay ug epektibo nga operasyon.
Ang Probinsiya sa Sugbo adunay pipila ka programa kalabotan sa bugas sa NFA sama sa Sugbo Merkadong Barato diin ang bugas gibaligya og P25 matag kilo; Bugasan sa Kababayen-an sa Barangay nga nagbaligya usab sa bugas ngadto sa P27 matag kilo pinaagi sa mga grupo sa kababayen-an sa mga barangay ug ang Sugbo School Feeding program nga naghatag og pagkaon sa mga tinun-an gikan sa kindergarten ngadto grade 12 lukop probinsiya. (BANAT NEWS)