CEBU, Philippines — Usa ka Hero’s welcome ang mosugat unya ni Allen Aldrin Castañeda atol sa iyang pag-uli balik sa Dakbayan sa Sugbo gikan sa Paris Olympics, human sa dungog nga iyang gidala para sa mga Sugboanon nga maoy nigiya kang Paris Olympics double-gold medalist Carlos Edriel Yulo.
Sumala pa ni acting Mayor Raymond Alvin Garcia, usa ka dakong garbo ug dungog sa siyudad ang kalamposan ni Yulo ug Castañeda. Si Castañeda lumad nga taga Barangay Hipodromo ning dakbayan.
Matud pa ni Garcia, kung mouli si Castañeda, usa gyud ka hero’s welcome ang ilang ihatag. Ang mga opisyal sa Barangay Hipodromo pinangulohan ni Kapitan Ruperto Bacolod, nangandam na usab sa pagbalik ni Coach Aldrin kay dako kining garbo ug dungog sa ilang barangay.
Ang mga opisyal sa barangay nagtigum ug aduna nay mga plano sa pagabot ni Coach Aldrin, sama sa pagpahimo ug mga tarpaulin nga idayan-dayan sa kabarangayan ug uban pa.
Wala pay petsa ug adlaw kung kanus-a mahibalik ang coach dinhi sa Sugbo. IBM BANAT NEWS