CEBU, Philippines — Giduso karon sa siyam ka gobernador sa Visayas ang pag-umol og One Visayas bloc.
Ang maong grupo nagtinguha sa paghiusa sa 16 ka probinsya sa Visayas alang sa hiniusang tingog pagtubag sa kasagaran nga isyu sa mga rehiyon ug adbokasiya ngadto sa national.
Ang maong plano naumol niadtong Agosto 5, 2024 diha sa Kapitolyo diin ang mga gobernador gikan sa nagkadaiyang probinsiya nitambong sa opening salvo sa ika-455 nga founding anniversary sa Probinsiya sa Sugbo.
Apil sa maong kasabotan sila si Iloilo Governor Arthur Defensor, Jr.; Southern Leyte Governor Damian Mercado; Eastern Samar Governor Ben Evardone; Siquijor Governor Jake Villa; Guimaras Governor Joaquin Carlos “JC” Nava; Aklan Governor Jose Enrique Miraflores; Negros Occidental Governor Eugenio Jose “Bong” Lacson; ug Bohol Governor Erico Aristotle Aumentado.
“Para mas malakas tayo na makahingi ng tulong, mas maigi nalang kung at least may isang boses din tayong mga Bisaya”, matud ni Miraflores sa taho sa Capitol Information Office.
Nasayran nga ang mga nahisgutang gobernador pabor nga si Gobernador Gwendolyn Garcia sa Probinsiya sa Sugbo maoy mangulo kanila.
Ang maong plano naumol human nipirma og manifesto ang mga gobernador pagsuporta sa administrasyon ni Presidente Ferdinand “Bongbong” Marcos, Jr. BDB BANAT NEWS