CEBU, Philippines — Gidasig sa kadagkuan sa City Traffic Management System sa siyudad sa Mandaue ang mga driver nga madakpan sa kalapasan sa balaud sa trapiko sa pagsagop na sa online payment sa ilang bayranan nga multa.
Kini tungod kay namatikdan nga wa pa gayud hingpit nga gisagop sa mga driver ang online payment.
Suma pa ni Rodirick Dano inspector sa CTMS nga modawat na sila og online payment pinaagi sa GCash sa mga multa aron dili na kinahanglan nga moadto pa sa treasurer`s office ang mga driver. Dugang pa ni Dano nga mokabat sa 30 nila ka mga enforcer ang dunay GCash Quick Response (QR) code.
Apan namatikdan ni Dano nga bisan pa sa ilang gisagop nga online payment daghan gihapon sa mga driver ang adto sa treasurer`s office mobayad sa ilang multa.
Tumong sa online payment nga pagbayad sa multa mao ang pagwagtang na sa mga kahasol sa hingtungdan nga mga drayber nga makahimo og kalapasan sa trapiko. MEL BANAT NEWS