CEBU, Philippines — Gipadayag ni Presidente Ferdinand R. Marcos Jr. ang kamahinungdanon sa gawasnon nga prensa ug lig-on nga media aron mapadayong buhi ug naglihok ang demokrasya sa Pilipinas.
Gisulti kini sa presidente atol sa oath-taking sa Board of Trustees sa Association of Philippine Journalists–Samahang Plaridel Foundation Inc. sa Malacañang.
Siya nagkanayon nga ang media dakong tabang sa paghatud sa mga importanteng balita ug pahibalo ngadto sa publiko nga nagpalambo sa mahinungdanong diskusyon sa mga isyu.
Nakatabang kini sa pagsiguro nga ang mga opisyal sa gobyerno sama niya, mahimong manubag sa ilang aksyon pinaagi sa pag-ila sa ilang mga kalampusan ug pagtumbok sa ilang mga kakuwangan.
Busa gipasalig sa presidente ang suporta alang sa mga media sa Pilipinas pinaagi sa pagpanalipod sa ilang kaluwasan ug kaayuhan samtang nagbuhat sa ilang trabaho, pinaagi sa Presidential Task Force on Media Security (PTFoMS) nga naglakip sa pagmugna sa Media Safety Vanguards (MSV), operasyon sa usa ka 24/7 hotline number, ug paghatag og legal nga suporta.
Nanghinaot si Marcos nga magpadayon ang pagtinabangay sa pag-atiman sa usa ka libre ug luwas nga palibot para sa tanang media personnel alang sa usa ka Bagong Pilipinas.(BANAT NEWS)