CEBU, Philippines — Gipasakaan og reklamo ngadto sa Ombusdman ang usa ka barangay kapitan sa Lungsod sa Consolacion sa Lalawigan sa Sugbo.
Gipasanginlan kining nakalapas sa nepotismo tungod kay gipatrabaho sa ilang barangay hall ang iyang pag-umankon ug gipabungkag niini ang ilang signage nga nagkantidad og P80,000 nga "Kayod Tayud" ug giilisan kini og signage nga "Padayon Tayud" nga walay pagtugot sa ilang konseho.
Ang gipasakaan og reklamo mao si Tayud Barangay Kapitan Fe Cuyos diha sa Ombudsman nga giingong nakalapas sa Administrative Code of 1987, o Republic Act (RA) 3019 o giila nga Anti-Graft Corrupt and Practices Act.
Ang misang-at og reklamo mao ang kanhi barangay kapitan nga si Blessilda "Bingol" Villo niadtong Mayo 10, 2024.
Giawhag usab niya ang Ombudsman nga ipaubos si Cuyos sa preventive suspension samtang himoon pa ang imbestigasyon.
Hinuon gitubag na ni Cuyos ang maong reklamo ug sa iyang counter-affidavit nga iyang giduso sa Ombudsman niadtong Hulyo 12, 2024 kusganon niyang gipanghimakak ang maong pasangil ngadto kaniya.
Matud pa ni Cuyos nga ang maong reklamo batok kaniya usa lamang ka pamaagi sa pagpangharas ug dili na hinuon kini makatarong ilang trabaho nga mga opisyal sa barangay.
Sa reklamo ni Villo iyang gialegar nga ang pag-umangkon ni Cuyos nga si Rommel Paul Cuyos Fariolen gi-hire isip iyang staff ug nagdawat kini og P15,000 nga honorarium sa matag bulan.
Giingong mas dako kini sa uban nga mga staff nga nagdawat lamang og honorarium nga P7 mil ngadto sa P12 mil matag bulan.
Si Villo ug si Cuyos maoy nagsangka sa nakalabay nga barangay elections diin napukan ang nahauna. (BANAT NEWS)