CEBU, Philippines — Gitutokan karon sa National Nutrition Council ang pagtisok sa sistema sa katawhan nga motuman sa pamaagi aron maangkon gyud ang saktong nutrisyon sa lawas.
Base sa data sa NNC moabot sa 7.2percent o 47,800 ka mga bata ang natala sa tibuok Central Visayas nga nakasinati og stunting malnutrition o pagkaputot.
Ang Regional Coordinator sa NNC Dr. Parolita Mission niklaro nga mas ubos kini itandi sa nilabayng tuig tungod kay gihingusgan nila ang gihimong intervention.
Lakip sa nakatampo sa wala pagtubo o pagkaputot sa bata mao ang matang sa pagkaon nga gidalit sa kabataan nga gihimo sa mga nag-atiman kanila apil ang mga ginikanan.
Gipahimug-atan ni Mission nga crucial kaayo ang unang usa ka libo ka adlaw o gikan sa pagpanamkon hangtud sa duha ka tuig sa bata nga maatiman ang development niini alang sa sakto nga paglambo o pagtubo sa lawas. Aron matisok sa alimpatakan sa mga tawo ang proactive measure batok sa malnutrition gigamit na karon sa National Nutrition Council ang mga social media platform alang sa healthy life advocacy. (BANAT NEWS)